کامریڈ چنگیز نے کہا کہ مریضوں کو علاج کی بہتر سہولیات دینے اور ڈاکٹروں کے مطالبات منظور کرنے کی بجائے لاہور میں سروسز ہسپتال میں ینگ ڈاکٹروں کے جنرل اجلاس پر رات گئے پولیس نے حملہ کر دیا اور انہیں شدید تشدد کا نشانہ بناتے ہوئے جیلوں میں بند کر دیا۔اسی طرح کا حملہ دیگر ہسپتالوں اورپنجاب کے تمام شہروں میں کیا گیا۔اس حملے کے بعد بہت سے ینگ ڈاکٹر روپوش ہوگئے جس کے باعث ہسپتالوں کی ایمرجنسی اور ان ڈور کا کام شدید متاثر ہوا جس کی تمام تر ذمہ داری شہباز شریف پر عائد ہوتی ہے۔اس دوران ایمرجنسی میں جتنے مریض جاں بحق ہوں گے ان کا ذمہ دار شہباز شریف ہو گا۔ نام نہاد آزاد عدلیہ تو کچھ نہیں کرے گی لیکن عوام قاتل وزیر اعلیٰ کو کیفر کردار تک ضرور پہنچائیں گے۔
پاکستان ٹریڈ یونین ڈیفنس کمپئین مطالبہ کرتی ہے کہ تمام گرفتار ڈاکٹروں کو فوری طور پر رہا کیا جائے اور ان کا سروس اسٹرکچر کا مطالبہ فوری طور پر تسلیم کر کے پنجاب میں لاگو کیا جائے۔وزیر اعلیٰ، وزرااور تمام افسران کو سرکاری ہسپتالوں سے علاج کروانے کا پابند کیا جائے۔پی ٹی یو ڈی سی دوسری مزدور یونینوں سے بھی اپیل کرتی ہے کہ وہ بہتر علاج کی اس جدوجہد میں نوجوان ڈاکٹروں کا ساتھ دیں۔ اگر یہ مطالبات منظور نہ کیے گئے تو پی ٹی یو ڈی سی ینگ ڈاکٹروں کے ساتھ مل کر اس جدوجہد کو جاری رکھے گی۔ اس مقصد کے لیے یورپ سمیت دنیا کے دیگر ممالک کی مزدور یونینوں سے بھی یکجہتی کی اپیل کی جائے گی کہ وہ اس جدوجہد میں ہمارا ساتھ دیں۔