سرخ پرچم کو عورت اُٹھائے گی اب

Supporters of the Greek Communist party

گیت محنت کی عظمت کے گائے گی اب
سرخ پرچم کو عورت اُٹھائے گی اب
یہ وڈیرے جو ظلم اس پہ ڈھاتے رہے
اُن کی دستار ٹھوکر پہ لائے گی اب
زر پرستوں کے دل خوف کھانے لگیں
کام ایسے بھی کر کے دکھائے گی اب
اونچے محلوں کی زینت بڑھاتی رہی
اپنے آنگن کو جنت بنائے گی اب
اہلِ مذہب رکاوٹ بنے بھی اگر
وہ قدم اپنے آگے بڑھائے گی اب
کیوں صلہ اس کو محنت کا آدھا ملے
ہاتھ حق کے لیے وہ اٹھائے گی اب
ہوں گے مِلوں کے مالک یہ مزدور سب
اس کے لب سے صدا یہ ہی آئے گی اب
سرخ پرچم کو تھامے ہوئے ہاتھ میں
سوئے منزل ہمیں لے کے جائے گی اب
آج طاہرؔ کو عورت سے امید ہے
رہبری ہم کو کر کے دکھائے گی اب

ڈاکٹر طاہرؔ شبیر